Hamna på Bølandet – sett frå Settemsøran. Dette var heimen til Kjell Bøe, ein av dei store heltane mine frå det legendariske fotballaget på 60-talet.
Bøfjorden er den finaste fjorden på Nordmøre. Ja, han er blant dei vakraste i heile fylket vårt. Eg meiner å kunne uttale meg med ein viss pondus og autoritet. Få er dei fjordarmane i Møre og Romsdal som eg ikkje har vore attmed.
Utsikt utover fjorden frå Mjøksand, som i min barndom var eit eventyr av ein badeplass.
Halvparten av røtene mine er solid festa i dette landskapet. Det er eg stolt av. Ole Gunnar Solskjær kan også skryte av å vere halvt bøfjording. Vi er ein eksklusiv klubb. Eg har til og med hatt mor til Manchester United-manageren som lærarinne.
Det er vakkert kring ein fjord.
Bøfjorden er for meg identitet. Bøfjorden er gode minne. Alltid er det spesielt å kome hit. Denne vesle teksten og bileta er ein hyllest til ei bygd og ein fager fjord, som fanga meg heilt frå eg var liten.
Her ser ein heilt inn til Åsskard.Grasholmen – eit smykke i fjorden. Ingen beitedyr å sjå der i sommar. Eg håpar attgroinga ikkje tek over .
Eg har vore lokalavisredaktør i ein mannsalder. Opp gjennom åra har eg meint mangt om utruleg mykje. No er eg pensjonist, men har ikkje tenkt å legge ned pennen.
Vis alle innlegg av Lars Steinar Ansnes
